ရောက်ပါပြီတဲ့ နယူးဒေလီနဲ့ ကြယ် (၁၀) ပွင့် ဟိုတယ်

အိန္ဒိယ သွားခဲ့တာ မနှစ်က ဒီက နွေရာသီ ( ဇွန်.. ဂျူလိုင်) လမှာပါ..။ ဟိုမှာကလည်း ပူလိုက်တာ အားလုံးအသိ အနဲဆုံး အပူချိန် ၃၀ နဲ့ ၃၈ စင်တီဂရိတ်ကြားတော့ရှိတက်ပါတယ်..။ (အဲဒီအချိန်က အပူလိုင်းက ဖြတ်သွားပသေး..။) ဒီကနေ ဝယ်ထားတာက နယူးဒေလီ လတ်မှတ်ပါ..။ တော်အိလျော်အိ ဟိုတယ်လည်း တခါတည်း ဘွတ်ထားလိုက်လေရဲ့..။ လေယာဉ်ကွင်း စဆင်းလိုက်ကတည်းက ထုံးစံအတိုင်း မြေပြင်အပူ လေပူနဲ့ ထိတွေ့လိုက်တော့ တခါတည်း နွေးကနဲပါပဲ..။ အသားတွေ ဆိုတာ လောင်ပြီးလားတောင် ထင်ရမလောက် ပူလောင်မှု..။ လူ့ငရဲ ပဲ.. ( အပြစ်လုပ်လို့ ကျတဲ့ငရဲဆိုတာ ရှိခဲ့ရင် ဘယ်လောက်တောင် ပူလောင်မလဲမသိ..။ ) ခရီးဆောင် အိတ်တွေကို တခါတည်း ယူသွားပါတယ်..။ ပြီးတော့ ပြည်ဝင်လာတဲ့ ဧည့်သည်များကို စစ်ဆေးတဲ့ ကောင်တာမှာ စောင့်ရပါတယ်..။ အကုန်လုံးလည်း ( H1N1) ရောဂါ ကာကွယ်တဲ့ အနေနဲ့ နာခေါင်းမှာ စည်းထားကြလေရဲ့ ( ရယ်စရာပဲ.. မျက်စိကနေ ရောဂါ မကူးတော့တာ ကြနေတာပဲ..။) ။ မဗေဒါတို့တော့ ဘာမှမစည်းဘူး.. ဖြစ်ချင်တာဖြစ်ပဲ..။ အမှန်ကတော့ ကြောက်လျှက်နဲ့ မစည်းပဲ ထားလိုက်တာ.. ။

တော်သေးတယ် ဘယ်လို အတားအဆီးမှ မလာတော့ဘူး.. အတားအဆီးဆိုတာကို ပထမ ကုလား ဗီဇာ ရဖို့ ဘယ်လောက်ထိ မဗေဒါ စွာခဲ့ သောက ဖြစ်ခဲ့သလဲဆိုတာ အဲဒီပို့စိ ဖတ်ပြီးသူတွေက သိမှာပါ.. ဒါကြောင့် အခုလို ကုလားပြည်ကြီးမှာ အရစ် မခံရပဲ ရှောရူစွာပဲ လေဆိပ်အပြင်ကို ရောက်ခဲ့ တာကို ပျော်ရွင်နေခဲ့ရတာ ပေါ့..။ အပြင်ရောက်တော့လည်း ဟဲ့ ဘယ်လိုဖြစ်တာလည်း စုတ်ပြတ်နေတာပဲ.. ငါနှယ်.. နယူး (New) ဒေလီ ဆိုတာ ဟုတ်ရဲ့လားပေါ့..။ ဘယ်လိုမှလည်း နယူး မဖြစ်ပါလားပေါ့.. ဟိုကြည့်ဒီကြည့်ပေါ့..။ ကြည့်သာကြည့်တာ နဲနဲလန့်တယ်..။ ယောက်ျားရော ကိုယ်ရော အူကြောင်ကြောင်ဖြစ်ပါလေရော..။ အမယ် .. အေတီအမ် စက်တော့ရှိတယ်..။ ယောက်ျားကို အကာအကွယ်ယူပေးထားပြီး ငွေထုတ်တာပေါ့..။

ရူးပီ တွေပေါ့..။ ၂ သောင်း ၃ သောင်းလောက် ထုတ်ပြီး သေချာသိမ်းရတယ်.. ကိုယ့်ကို လူစိမ်းဆိုပြီး လာလုမှာတို့ဘာတို့ ကြောက်လို့..။ ခဏနေတော့ တက္ကစီဌားတဲ့ ကောင်တာမှာ သွားဌားရတယ်..။ အမယ် .. တက္ကစီဆိုတော့လည်း အဟုတ်မှတ်လို့.. မြန်မာပြည်က သုံးဘီးလို ခပ် ပုပု.. ညစ်ညစ် ပတ်ပတ် ကားတစီးရောက်လာပါတယ်..။ အဲဒါ လည်း ဟိုပြေး ဒီပြေးပြီး စောင့်လိုက်ရတယ်..။ ဟိုလူက ဒါမဟုတ်ဘူး နောက်တစီး .. နောက်တယောက်ကလည်း ဒါမဟုတ်ဘူး ဟိုဟာ နဲ့ တောင်ပြေး မြောက်ပြေး..။ တော်သေးတယ် သောင်ပြင်လွတ်တဲ့ ငါးကလေးလို မဖြစ်လို့..။ ဖြစ်လို့ ဘယ်ရမလဲနော် ကိုယ့်မှာ လူသူလေးစားတဲ့ နော်ဝေးနိုင်ငံက အသိအမှတ်ပြု စာအုပ်ကလေးပါလာတာကိုး..။

ဘယ် ကား တက်ရမှန်း မသိဘူး..။ အသက်ကြီးကြီး အဘိုးကြီးတယောက် ခေါင်းခါခါ လည်ခါခါ နဲ့ အထုပ်တွေ ဝိုင်းတင်ပြီး မောင်းတော့တာပဲ..။ ပြောရအုံးမယ်.. သားနဲ့ သမီးက လေယာဉ်ကွင်းမှာ ကတည်းက အိမ်ပြန်မယ်ပဲ ပြောကြတော့တာပဲ.. ပူလို့ ညစ်ပတ်လို့တဲ့.. .။ ပြောလိုက်ရှင်းလိုက် ရတာ မပြောနဲ့တော့..။ စိတ်ညစ်ရသေး..။ အိန္ဒိယ ရောက်ပြီဆိုပြီး စောပလော်တီးလို့လည်း မရပြန်ဘူး.. အဲဒီမှာလည်း ကိုယ်ထိလက်ရောက် လုပ်တာကို လုံးဝခွင့်မပြုဆိုပဲ..။ မလုပ်ပါဘူး.. စိတ်မရှည်တရှည်နဲ့ ပူပူလောင်လောင်ထဲ ရှင်းပြရသေးတယ်..။ ကိုယ်က ကိုယ်သွားမဲ့ ဟိုတယ် ကို အဘိုးကြီးကို လိပ်စာပြလိုက်တယ်..။ အဘိုးကြီးကို မဗေဒါ တို့ က အင်္ဂလိပ်လိုပြော.. မေး.. သူလည်း ပြန်ပြော.. မဗေဒါလည်း ထပ်ပြော.. ပေါ့..။ နောက် သမီးက မေးတယ်.. သူ အမေတို့ပြောတာ နားလည်လို့လားတဲ့..။

အေး ဟုတ်သားပဲ..။ သူပြောတာ ငါနားမလည်ပဲ ဘာလို့ ဆက်ပြောနေတာလဲပေါ့..။ သူက နားလည်မယ်ထင်တာပဲ.. ခေါင်းကတော့ ခါ နေတာပဲ ( ကုလားများက မှန်တယ်ဆိုရင် ခေါင်းခါပါတယ်.. ) ။ ကုလား အဘိုးကြီး မောင်းလိုက်တာ ဆိုတာ တော်တော်လေးကြာတယ်.. နာရီ နဲ့ချီကြာတယ်.. သူကြာတော့ ကျွန်မတို့ မိသားစု (၃) ယောက်လုံး က တယောက်တမျိုးပြော.. သူလည်း ပြောချင်တာပြော။ ကျွန်မတို့ကလည်း ပြောချင်တာပြော.. မတက်တတက် နော်ဝေးစကားလည်း ပါသွားလိုက်သေး.. တယိုင်ယိုင်နဲ့.. (ယိုင်ဆိုတာက နော်ဝေးလို ငါ လို့ ဆိုလိုတာပါ..။) ကျွန်မကလည်း အရယ်သန်တော့ အကုန်လိုက်ရယ်.. သမီးက လူကြီးလို နေတက်တော့ ကျွန်မကို စိတ်တို.. အမေကလည်း ရယ်နေတာပဲ .. ဘယ်ကိုမောင်းနေတာလဲမသိ ဆိုတော့မှ.. ဟုတ်ပေသားပဲပေါ့.. မှောင်နေတာလည်း တူးချစ်နေပါ့..။ ဒါပေမယ့် .. ညပိုင်းဆိုတော့ လေက တိုက်တယ် နဲနဲအေးလာတယ်..။ အဲဒီ နယူးဒေလီ ထဲ လှည့်မောင်း နေတာ အတော်လေး ကြာသလို မှောင်ကလည်း တအားမှောင်လာတော့ ဆက်.. မရယ်နိုင်တော့ဘူး.. နဲနဲတော့ လန့်တာပေါ့..။ တည်းမဲ့ ဟိုတယ်ကလည်း ဒိတ်ဒိတ်ကြဲပဲ ( ကြယ် ၁၀ ပွင့် ဆိုတော့ မနည်းရှာရတယ်) .. ရှာလိုက်ရတာ မပြောပါနဲ့တော့..။

အဲဒီ ဟိုတယ်နား ရောက်နေပါရဲ့ နဲ့ အဘိုးကြီးက မသိတော့ ပတ်ရှာနေတာတင် နာရီဝက်လောက် ကြာသွားလေရဲ့..။ လမ်းဘေး အေးအေးလူလူ အိပ်နေတဲ့သူလည်း ရှိလိုက်သေး..။ ဟိုတယ်လည်း ရောက်ရော.. ထွက်ကြိုကြတယ်.. ကောင်လေး (၃) ယောက်..။ အမယ်လေး ဆင်းရဲတဲ့ ပုံစံတွေပဲ… သားသားနားနားလည်း မဟုတ်တော့ တည်းရမှာတောင် နည်းနည်း လန့်သလို ဖြစ်သွားတယ်..။ နောက် ဟိုတယ် အပြင်အဆင်ကလည်း ညံ့.. ကုပ်ချောင်းချောင်း အိမ်အိုလိုမျိုး..။ အဲဒါပေါ့ လူတွေများ ဆင်းရဲတာကို မနေဘူး မကြုံဘူးတာလည်း မဟုတ်.. အလိုလိုကို ကြောက်နေတာ..။ ဘာကို ကြောက်သလဲမေးတော့ ပုံစံတွေက မပြည်စုံ.. နေရာထိုင်ခင်းက မလှပတော့  စိတ်ထဲမှာ ငါတို့ကို သူတို့ တခုခု လုပ်မလားပဲ ထင်နေမိတယ်..။ ( အင်း.. လူလိုနေရတဲ့ နိုင်ငံမှာ ၅ နှစ်လောက် နေရရုံပဲ ရှိသေးတယ်..ဘယ်လို ဖြစ်နေမှန်းကို မသိတဲ့လူ့စိတ်.. ) မဗေဒါရဲ့ စိတ်ထဲမှာ မလုံခြုံတာကို အရမ်းကြောက်နေမိတယ်..။

ဟိုတယ်လေးက သိပ်မသားနားဘူး.. သူတို့ နေရာချထားတဲ့ ဆီမှာပဲ.. အခန်းတွေ နေရာယူ ..လိုက်တော့တယ်.. မဆိုးဘူး.. အဲကွန်းတော့လည်း ရှိပြန်သေးတယ်။ ယူကတည်းက ရှိတာကို ရွေးခဲ့တာကိုး..။ ဒါပေမယ့်လည်း အခန်းတွေက ပေးတဲ့ငွေနဲ့ တန်သား.. သိပ်မဆိုးဘူး..။ ဘာပဲပြောပြော အဲကွန်းပါတော့ အားလုံးအတွက်.. အဆင်ပြေသွားတယ်..။ သားနဲ့သမီးလည်း လေအေးနဲ့အခန်းထဲ နေရတော့ သိပ်မပူဆာတော့ဘူး..။ ပါလာတဲ့ ချောကလက်တွေ မုန့်တွေကို အကုန် ရေခဲသေတ္တာ သေးလေးထဲထည့် .. ပြီးတော့ အစားတွေ မှာစားတော့တာပဲ..။ အဲဒီအချိန်က သန်းခေါင်ဖြစ်နေပြီ.. လွယ်လွယ်ကူကူ ထမင်းကြော်ပဲ.. နောက် နွားနို့ပူပူလေး..။ စီးကပ်နေတဲ့ ကိုယ်ခန္ဓာကို ရေ.. မိုး .. ချိုးပြီး အိပ် စက်ဖို့ အားယူရင်း .. အမောဖြေလိုက်တော့တာပဲ..။ အိပ်တော့မပျော်ဘူးပေါ့..။

(ပေါ့ပေါ့းပါးပါး အင်မတန် ဖတ်ချင်နေတဲ့ မောင်ဇေအတွက် .. ရေးပေးပါသည်..။)

မဗေဒါ
၁.၀၆.၂၀၁၀